माओवादीका मुख्यमन्त्रीको टुंगो केन्द्रीय सचिवालय बैठकले लगाउने

माओवादी केन्द्रले प्रादेशिक सरकारको मुख्यमन्त्रीको चयन पार्टीको केन्द्रीय सचिवालयबाट गर्ने भएको छ। ६ र ७ नम्बर प्रदेशमा मुख्यमन्त्री पाउने निश्चित गरेको माओवादीले प्रादेशिक सरकारको नेतृत्वबारे हेडक्वार्टर बैठकबाट टुंगो लगाउने तयारी गरेको हो। वाम गठबन्धनसँगको समझदारी अनुसार माओवादीले ६ र ७ नम्बर प्रदेशमा मुख्यमन्त्री पाउने पाउनेछ। पार्टी प्रवक्ता पम्फा भुसालले पार्टीको प्रदेश कमिटी र प्रदेशको संसदीय दलको सिफारिस अनुसार केन्द्रले मुख्यमन्त्रीको टुंगो लगाउने बताइन्। एमालेसँगको सहमति अनुसार माओवादी केन्द्रले दुई प्रदेशमा मुख्यमन्त्री पाउनेछ भने प्रदेश ४ र ५ सभामुख र १, ३, ६ र ७ नम्बर प्रदेशमा उपसभामुख पाउनेछ। प्रादेशिक मन्त्रिमण्डलमा माओवादीले आफूलाई ३० र एमालेलाई ७० प्रतिशतको भागबन्डामा सहमति जनाइसकेको छ। वाम गठबन्धनको अर्को घटक एमालेले भने मंगलबार बसेको स्थायी समितिको बैठकले मुख्यमन्त्री चयन गर्ने अधिकारी सम्बन्धित प्रदेशसभालाई नै दिने निर्णय गरेको छ।